Acisa Ribadeo fai un balance moi positivo do 2023. Neste ano que remata o colectivo
empresarial ribadense organizou máis de 40 actividades, colaborou en máis de 10
eventos doutras entidades e superou os 170 asociados e asociadas. O obxectivo para
o 2024 “é seguir medrando en número de socios”, segundo subliñou a presidenta,
Carmen Cruzado.
O xerente de Acisa, Jesús Pérez explicou que, “hoxe facemos balance do 2023 no que
organizamos mais de 40 actividades de dinamización comercial e hostaleira e foi o ano
no que mais materiais gratuítos repartimos, preto de 80.000. Ambas cifras son de
récord para Acisa. Colaboramos con mais de 10 entidades ou eventos deportivos como
o Torneo de Veteranos, coa SD Ribadeo, coa Media Maratón e coorganizamos, xunto ao
Concello, o Entroido, o Ribadeo Indiano, ou o Nadal…, actividades que atraen a miles de
potenciais clientes ao longo do ano”.
Pérez Prada contou que “pechamos o 2023 con máis de 170 socios e socias,
recuperando cifras previas á pandemia, e cun récord de altas no ano de case 30 novos
negocios adheridos”.
A presidenta de Acisa, Carmen Cruzado, subliñou que “o obxectivo para o 2024 é seguir
medrando. Queremos que máis empresas se sumen a Acisa Ribadeo. A organización de
actividades, a entrega de materiais gratuítos, o asesoramento e a colaboración avalan o
traballo que estamos a realizar. E nesa liña imos seguir. Non nos fartamos de dicilo
cantos máis sexamos en Acisa moito mellor para todo o empresariado ribadense,
porque poderemos facer máis forza diante das administracións para conseguir
subvencións destinadas á dinamización do comercio, da hostalería e dos servizos en
Ribadeo. E todo iso redundará na economía local”.
Cruzado Iglesias declarou que “estamos moi satisfeitos co traballo realizado este ano,
puidemos introducir novidades importantes como o rasca e gaña, as xornadas de
exaltación da merluza de Burela, o curso de inglés para asociados, e con melloras
noutras citas como San Valentin, as xornadas Asturias en Ribadeo… Tamén seguimos a
colaborar co Concello de Ribadeo nas Panchas, no Ribadeo Indiano; coa a Xunta no
Bono Activa, coa Federación de Comercio, nas súas campañas como os días azuis, … e
no tocante aos materiais puidemos repetir cos vasos de plástico, vasos térmicos,
envases e bolsas de comida para levar, bolsas de botellas de viño, bolsas para o
comercio e este ano incluimos tamén como novidade os mapas turísticos para hoteis”.
A presidenta de Acisa indicou que “Ribadeo segue sendo referente comarcal tanto en
Galicia coma en Asturias no comercio, na hostalaría e no turismo e tamén a nivel
nacional. Somos o mellor lugar para comprar, para saborear a mellor gastronomía e
tendo as mellores vistas. Poucos lugares poden ofrecer tanto coma Ribadeo. Dende
Acisa seguiremos a traballar nos nosos obxectivos, que son facer medrar a Ribadeo e
aos seus negocios, axudando a manter eses mais de 600 postos de traballo que xeran os
nosos asociados e asociadas e esperando facer medrar a nosa entidade e podendo
organizar moitas mais actividades”.
O xerente de Acisa dixo que “se falamos de cifras este ano 2023 manexamos un
presuposto que no peche de contas roldará os 130.000 euros, que estimamos que
puideron xerar varios millóns de euros en movemento económico ao longo de todo o
ano. Preto de 48.000 euros foron para campañas propias de Acisa, unha cifra que ano a
ano conseguimos ampliar, preto de 22.000 destináronse a materiais gratuítos para
socios, repartíronse preto de 5.000 euros en vales de compra, e destinamos preto de
5.000 euros a colaboracións con outras entidades. Agradecemos tamén a axuda das
empresas privadas que neste 2023 estiveron confiando e apoiando a Acisa cunha cifra
histórica que chegou aos 6.500 euros. Iso quere dicir que somos un referente para eles
e que o noso traballo, a nosa asociación e as actividades que organizamos son un bo
escaparate para estas firmas”.
E engadiu: “xeramos unhas 1.000 publicacións en prensa, o noso perfil de Facebook
segue medrando con mais de 6.000 seguidores e varios centos de miles de
visualizacións ao ano e a nosa web conta con mais de 50.000 visitas anuais, servindo
estas plataformas como medios de publicidade e promoción dos nosos asociados e
asociadas”.
Dende Acisa, presidenta e xerente, agradecen a os seus socios e socias a súa confianza,
no traballo que realizan. E remataron: “queremos tamén dar grazas ás administracións
local, provincial e autonómica por seguir colaborando con nos ao longo do ano e
atendendo as nosas necesidades e peticións, así como ás empresas que patrocinaron
durante o 2023 e van patrocinar as nosas actividades o vindeiro ano. Aproveitamos a
ocasión para desexarlle á veciñanza de Ribadeo e aos visitantes un feliz e prospero ano
2024 e animámolos a seguir apostando por esta vila, polo seu comercio, pola súa
hostalería, polos seus servizos e por Ribadeo como destino turístico”.
