ACISA RIBADEO E MARIÑA ASESORES ASINARON UN CONVENIO DE COLABORACIÓN QUE LLES PERMITIRÁ AOS ASOCIADOS E ASOCIADAS CONTAR CON ASESORAMENTO DE BALDE EN CUESTIÓNS XURÍDICAS OU ADMINISTRATIVAS E TAMÉN EN REDES SOCIAIS EMPRESARIAIS
Acisa Ribadeo e Mariña Asesores asinaron nas últimas horas un convenio de colaboración que lles permitirá aos asociados e asociadas do colectivo empresarial contar con asesoramento de balde en cuestións xurídicas ou administrativas e tamén en redes sociais empresariais. Ademais os profesionais desta firma impartirán sesións formativas gratuítas sobre temas de interese para a Asociación de Comerciantes, Industriais, Servizos e Autónomos de Ribadeo.
Desde Mariña Asesores explican que “o convenio consiste en ofrecer un asesoramento de balde para responder dúbidas aos asociados en cuestións xurídicas, administrativas, legais, subvencións, fiscalidade e contabilidade. E tamén sobre redes sociais empresariais”.
E engaden que “imos realizar varias sesións formativas gratuítas para os socios no formato de charla-coloquio. Xa están pechadas dúas atendendo a intereses dos empresarios locais: protección de datos e redes sociais para empresas”.
Desde Mariña Asesores Sergio e Beatriz Irigoyen amósanse “moi ilusionados de colaborar coa asociación de empresarios de referencia en Ribadeo” e insisten en que “só co traballo entre todos os pequenos negocios e empresas da contorna poderase seguir construíndo unha localidade con futuro”.
Desde Acisa o seu presidente, Francisco Iriarte, subliña que “este é un novo convenio, que se suma aos xa asinados no seu día con entidades bancarias, empresas de telefonía, de mensaxería, de electricidade, etc… que o que perseguen é aumentar a carteira dos servizos que desde Acisa se prestan ás nosas asociadas e asociados conseguindo vantaxes importantes para todos eles”.
