MEDIO CENTO DE PERSOAS ASISTIRON Á XORNADA TÉCNICA SOBRE A XESTIÓN DO ESTRÉS
ACISA AGARDA QUE “FOSE DE UTILIDADE PARA TODOS OS ASISTENTES”
Medio cento de persoas asistiron na noite de onte á xornada técnica sobre a xestión do estrés, organizada por Acisa. Ao acto, celebrado no salón de actos da antiga Casa Sindical, asistiron asociados e asociadas así como público en xeral que durante dúas horas escoitaron atentamente á conferenciante.
Mª del Mar Arias Matilla, psicóloga e técnica de Prevención de Riscos Laborais da Mutua Universal, falou do estrés positivo “que é necesario” e do estrés negativo “que se non somos capaces de controlar pode ocasionarnos diferentes tipos de patoloxías. O estrés hai que saber xestionalo. Si o día a día é estresante a nosa mente estará esgotada e non renderemos ben no traballo”. Esas situación de estrés poden ocasionar cansancio, tensión muscular, problemas dixestivos, dermatite, caída de pelo, insomnio, ansiedade, depresión…
Arias Matilla referíuse ás consecuencias do estrés, ás diferenzas individuais na resistencia diante desta patoloxía, así como a algunhas estratexias para afrontar a autoxestión do estrés, habilidades mentais e de comportamento, pautas de autocoidado, etc… A psicóloga e técnica de Prevención de Riscos Laborais da Mutua Universal empregou un proxector para a súa intervención e mantivo un constante diálogo e intercambio de opinións cos asistentes a esta xornada técnica.
Algunhas das recomendacións nas que insistiu Mª del Mar Arias Matilla foron na necesidade de durmir entre 7 e 9 horas, facer exercicio físico, levar unha dieta saudable, ter tempo para ti…
A directiva de Acisa sinala que “foi unha charla moi interesante, que a todos e todas nos fixo pensar nos nosos comportamentos diarios. Agardamos que fose de utilidade para todos os asistentes”.
